Ager Qismat sa Mein Un Ki Gali Mein Khak ho Jata Naat Lyric in Urdu

Tuesday, March 19, 2024

اگر قسمت سے میں ان کی گلی میں خاک ہو جاتا

غمِ کونین کا سارا بکھیڑا پاک ہو جاتا

جو اے گل جامۂ ہستی تری پوشاک ہو جاتا

تو خارِ نیستی سے کیوں اُلجھ کے چاک ہو جاتا

جو وہ اَبر کرم پھر آبروئے خاک ہو جاتا

تو اس کے دو ہی چھینٹوں میں زمانہ پاک ہو جاتا

ہوائے دامنِ رنگیں جو ویرانہ میں آ جاتی

لباسِ گل میں ظاہر ہر خس و خاشاک ہو جاتا

لب جاں بخش کی قربت حیاتِ جاوِداں دیتی

اگر ڈورا نفس کا ریشۂ مسواک ہو جاتا

ہوا دل سوختوں کو چاہیے تھی اُن کے دامن کی

الٰہی صبح محشر کا گریباں چاک ہو جاتا

اگر دو بوند پانی چشمۂ رحمت سے مل جاتا

مری ناپاکیوں کے میل دُھلتے پاک ہو جاتا

اگر پیوند ملبوسِ پیمبر کے نظر آتے

ترا اے حلۂ شاہی کلیجہ چاک ہوجاتا

جو وہ گل سونگھ لیتا پھول مرجھایا ہوا بلبل

بہارِ تازگی میں سب چمن کی ناک ہو جاتا

چمک جاتا مقدر جب دُرِ دَنداں کی طلعت سے

نہ کیوں رشتہ گہر کا ریشۂ مسواک ہوجاتا

عدو کی آنکھ بھی محشر میں حسرت سے نہ منھ تکتی

اگر تیرا کرم کچھ اے نگاہِ پاک ہو جاتا

بہارِ تازہ رہتیں کیوں خزاں میں دَھجیاں اُڑتیں

لباسِ گل جو اُن کی ملگجی پوشاک ہو جاتا

کماندارِ نبوت قادر اندازی میں یکتا ہیں

دو عالم کیوں نہ ان کا بستۂ فتراک ہو جاتا

نہ ہوتی شاق اگر دَر کی جدائی تیرے ذَرَّہ کو

قمر اِک اَور بھی روشن سر اَفلاک ہو جاتا

تری رحمت کے قبضہ میں ہے پیارے قلب ماہیت

مِرے حق میں نہ کیوں زہرِ گنہ تریاک ہو جاتا

خدا تارِ رَگِ جاں کی اگر عزت بڑھا دیتا

شراکِ نعل پاک سید لولاک ہو جاتا

تجلی گاہِ جاناں تک اُجالے سے پہنچ جاتے

جو تو اے توسن عمر رَواں چالاک ہو جاتا

اگر تیری بھرن اے اَبر رحمت کچھ کرم کرتی

ہمارا چشمۂ ہستی اُبل کر پاک ہو جاتا

حسنؔ اہل نظر عزت سے آنکھوں میں جگہ دیتے

اگر یہ مشت خاک اُن کی گلی کی خاک ہو جاتا

313+ Naat Lyrics in English & Urdu

پروردگار عالم کے فضل ، کرم اور مہربانی سے ، انسانی طاقت اور بساط کے مطابق احتیاط کی گئی ہے بشری تقاضے سے اگر کوئی غلطی نظر آئے یا لفظ درست نہ ہوں تو از راہ کرم مطلع فرما دیں۔ ان شاء اللہ عزوجل جلد از جلد میں ٹھیک کر دوں گا۔

نشاندہی کےلیے ہم آپ کے بے حد مشکور ہوں گے ۔ آپ کا بہت شکریہ

tajservices99@gmail.com

More Naat Lyrics: