Aah Har Lamha Gunah Ki Kasrat o Bharmaar Hay Lyrics in Urdu

Monday, January 22, 2024

Naat Lyrics ll Aah Har Lamha Gunah Ki Kasrat o Bharmaar Hay Lyrics in Urdu

آہ! ہر لمحہ گنَہ کی کثرت اور بھرمار ہے

غَلبۂ شیطان ہے اور نفسِ بداطوار ہے

مجرموں کے واسطے دوزخ بھی شُعلہ بار ہے

ہر گنہ قَصداً کیا ہے اسکا بھی اقرار ہے

ہائے! نافرمانیاں بدکاریاں بے باکیاں

آہ! نامے میں گناہوں کی بڑی بھر مار ہے

چھپ کے لوگوں سے گناہوں کا رہا ہے سلسلہ

تیرے آگے یاخدا ہر جرم کا اظہار ہے

زندگی کی شام ڈھلتی جا رہی ہے ہائے نفس!

گرم روز و شب گناہوں کاہی بس بازار ہے

یاخدا! رَحمت تری حاوی ہے تیرے قہر پر

فَضل و رَحمت کے سہارے جی رہا بدکار ہے

بندۂ بدکار ہوں بے حد ذلیل و خوار ہوں

مغفرت فرما الٰہی! تُو بڑا غفّار ہے

موت کے جھٹکوں پہ جھٹکے آرہے ہیں المدد

سخت بے چینی کے عالم میں گِھرا بیمار ہے

اب سَرِ بالیں خُدارا مسکراتے آیئے

جاں بَلَب شاہِ مدینہ طالبِ دیدار ہے

غسل دینے کے لئے غَسّال بھی اب آچکا

غسلِ میّت ہو رہا ہے اور کفن تیّار ہے

یانبی! پانی سے سارا جسم میرا دُھل گیا

نامۂ اعمال کو بھی غسل اب درکار ہے

لاد کر کندھوں پہ اَحباب آہ! قبرستاں چلے

واسطے تدفین کے گہرا گڑھا تیّار ہے

قبر میں مجھ کو لِٹا کر اور مِٹّی ڈال کر

چل دیے سا تھی نہ پاس اب کو ئی رِشتے دار ہے

خواب میں بھی ایسا اندھیرا کبھی دیکھا نہ تھا

جیسا اندھیرا ہماری قبر میں سرکار ہے

یارسولَ اللہ! آکر قبر روشن کیجئے

ذات بے شک آپ کی تو مَنبعِ انوار ہے

قبر میں شاہِ مدینہ آچکے مُنکر نکیر

ہو کرم! للہ بندہ بیکس و ناچار ہے

یانبی! جنّت کی کھڑکی قبر میں کُھلوایئے

پھر تو فضلِ رب سے اپنی قبر بھی گلزار ہے

تُو نے دنیا میں بھی عَیبوں کو چُھپایا یاخدا

حشر میں بھی لاج رکھ لینا کہ تُو ستّار ہے

نیکیاں پلّے نہیں آقا شَفاعت کیجئے

آپ کی نظرِ کرم ہوگی تو بَیڑا پار ہے

یانبی! عطارؔ کو جنّت میں دے اپنا جَوار

واسِطہ صِدّیق کا جو تیرا یارِ غار ہے

کاش! ہو ایسی مدینے میں کبھی تو حاضِری

یہ خبر آئے وطن میں مرگیا عطارؔ ہے

313+ Naat Lyrics in English & Urdu

پروردگار عالم کے فضل ، کرم اور مہربانی سے ، انسانی طاقت اور بساط کے مطابق احتیاط کی گئی ہے بشری تقاضے سے اگر کوئی غلطی نظر آئے یا لفظ درست نہ ہوں تو از راہ کرم مطلع فرما دیں۔ ان شاء اللہ عزوجل جلد از جلد میں ٹھیک کر دوں گا۔

نشاندہی کےلیے ہم آپ کے بے حد مشکور ہوں گے ۔ آپ کا بہت شکریہ

tajservices99@gmail.com

More Naat Lyrics: