Jitna Mera Khuda Ko Hai Mera Nabi Aziz Lyric In Urdu

Sunday, February 25, 2024

جتنا مِرے خدا کو ہے میرا نبی عزیز

کونین میں کسی کو نہ ہوگا کوئی عزیز

خاکِ مَدینہ پر مجھے اللہ موت دے

وہ مردہ دل ہے جس کو نہ ہو زندگی عزیز

کیوں جائیں ہم کہیں کہ غنی تم نے کر دیا

اب تو یہ گھر پسند یہ در یہ گلی عزیز

جو کچھ تری رضا ہے خدا کی وہی خوشی

جو کچھ تری خوشی ہے خدا کو وہی عزیز

گو ہم نمک حرام نکمے غلام ہیں

قربان پھر بھی رکھتی ہے رحمت تری عزیز

شانِ کرم کو اچھے برے سے غرض نہیں

اس کو سبھی پسند ہیں اس کو سبھی عزیز

منگتا کا ہاتھ اٹھا تو مدینہ ہی کی طرف

تیرا ہی دَر پسند تری ہی گلی عزیز

اس دَر کی خاک پر مجھے مرنا پسند ہے

تخت شہی پہ کس کو نہیں زندگی عزیز

کونین دے دیے ہیں تِرے اختیار میں

اللہ کو بھی کتنی ہے خاطر تری عزیز

محشر میں دو جہاں کو خدا کی خوشی کی چاہ

میرے حضور کی ہے خدا کو خوشی عزیز

قرآن کھا رہا ہے اسی خاک کی قسم

ہم کون ہیں خدا کو ہے تیری گلی عزیز

طیبہ کی خاک ہو کہ حیاتِ اَبد ملے

اے جاں بلب تجھے ہے اگر زندگی عزیز

سنگ ستم کے بعد دُعائے فلاح کی

بندے تو بندے ہیں تمہیں ہیں مدعی عزیز

دِل سے ذرا یہ کہہ دے کہ اُن کا غلام ہوں

ہر دشمن خدا ہو خدا کو ابھی عزیز

طیبہ کے ہوتے خلد بریں کیا کروں حسنؔ

مجھ کو یہی پسند ہے مجھ کو یہی عزیز

313+ Naat Lyrics in English & Urdu

پروردگار عالم کے فضل ، کرم اور مہربانی سے ، انسانی طاقت اور بساط کے مطابق احتیاط کی گئی ہے بشری تقاضے سے اگر کوئی غلطی نظر آئے یا لفظ درست نہ ہوں تو از راہ کرم مطلع فرما دیں۔ ان شاء اللہ عزوجل جلد از جلد میں ٹھیک کر دوں گا۔

نشاندہی کےلیے ہم آپ کے بے حد مشکور ہوں گے ۔ آپ کا بہت شکریہ

tajservices99@gmail.com

More Naat Lyrics: