Jan Se Tang Hain Qaidi Gham e Tanhai Ki Lyrics in Urdu

Monday, February 19, 2024

جان سے تنگ ہیں قیدی غمِ تنہائی کے

صدقے جاؤں میں تری اَنجمن آرائی کے

بزم آرا ہوں اُجالے تری زیبائی کے

کب سے مشتاق ہیں آئینے خود آرائی کے

ہو غبارِ دَرِ محبوب کہ گردِ رَہ دوست

جزوِ اَعظم ہیں یہی سرمۂ بینائی کے

خاک ہو جائے اگر تیری تمناؤں میں

کیوں ملیں خاک میں اَرمان تمنائی کے

وَ رَفَعْنَا لَکَ ذِکْرَک کے چمکتے خورشید

لامکاں تک ہیں اُجالے تری زیبائی کے

دلِ مشتاق میں اَرمانِ لقا آنکھیں بند

قابل دِید ہیں اَنداز تمنائی کے

لب جاں بخش کی کیا بات ہے سُبْحَانَ اللہ

تم نے زندہ کیے اعجاز مسیحائی کے

اپنے دامن میں چھپائیں وہ مرے عیبوں کو

اے زہے بخت مری ذِلت و رسوائی کے

دیکھنے والے خدا کے ہیں خدا شاہد ہے

دیکھنے والے تِرے جلوۂ زیبائی کے

جب غبارِ رَہِ محبوب نے عزت بخشی

آئنے صاف ہوئے عینکِ بینائی کے

بار سر پر ہے نقاہت سے گرا جاتا ہوں

صدقے جاؤں ترے بازو کی توانائی کے

عَالِمُ الْغَیْب نے ہر غیب سے آگاہ کیا

صدقے اِس شان کی بینائی و دانائی کے

دیکھنے والے ہو تم رات کی تاریکی میں

کان میں سمع کے اور آنکھ میں بینائی کے

غیبی نطفے ہیں وہ بے علم جنم کے اندھے

جن کو انکار ہیں اس علم و شناسائی کے

اے حسنؔ کعبہ ہی افضل سہی اس در سے مگر

ہم تو خوگر ہیں یہاں ناصیہ فرسائی کے

313+ Naat Lyrics in English & Urdu

پروردگار عالم کے فضل ، کرم اور مہربانی سے ، انسانی طاقت اور بساط کے مطابق احتیاط کی گئی ہے بشری تقاضے سے اگر کوئی غلطی نظر آئے یا لفظ درست نہ ہوں تو از راہ کرم مطلع فرما دیں۔ ان شاء اللہ عزوجل جلد از جلد میں ٹھیک کر دوں گا۔

نشاندہی کےلیے ہم آپ کے بے حد مشکور ہوں گے ۔ آپ کا بہت شکریہ

tajservices99@gmail.com

More Naat Lyrics: